ტრამპი: მე ტეილორ სვიფტი მძულს!

აშშ-ს ყოფილმა პრეზიდენტმა და 2024 წლის არჩევნებში რესპუბლიკური პარტიის საპრეზიდენტო კანდიდატმა, დონალდ ტრამპმა ამერიკელი პოპვარსკვლავის, ტეილორ სვიფტის შესახებ პოსტი გამოაქვეყნა მას შემდეგ, რაც რამდენიმე დღის წინ სვიფტმა საპრეზიდენტო არჩევნებში მხარდაჭერა ტრამპის დემოკრატ მეტოქეს, კამალა ჰარისს გამოუცხადა.

“მე ტეილორ სვიფტი მძულს!” – წერს ტრამპი საკუთარ პლატფორმა Truth Social-ზე გამოქვეყნებულ პოსტში.

10 სექტემბერს ტრამპსა და ჰარისს შორის გამართული საპრეზიდენტო დებატის შემდეგ, სვიფტმა საკუთარ Instagram ანგარიშზე, რომელსაც 284 მილიონზე მეტი გამომწერი ჰყავს, დაწერა, რომ იგი 2024 წლის არჩევნებში კამალა ჰარისისთვის აპირებს ხმის მიცემას.

“მე ხმას კამალა ჰარისს ვაძლევ, რადგან იგი იმ უფლებებისა და საერთო საქმეებისთვის იბრძვის, რომლებსაც ჩემი აზრით, გამარჯვებისთვის მებრძოლი სჭირდება”. – განაცხადა მან.

გამოქვეყნებულ პოსტში სვიფტმა ასევე დონალდ ტრამპის პლატფორმა Truth Social-ზე გავრცელებულ ყალბ AI (ხელოვნური ინტელექტით შექმნილ) ვიდეოს გამოეხმაურა, რომელშიც სვიფტი მხარდაჭერას ტრამპს უცხადებს. სვიფტის თქმით, ამ ფაქტმა მასში დეზინფორმაციასთან დაკავშირებით შიშები გამოიწვია.

ამას გარდა, მან ჰარისის ვიცეპრეზიდენტობის კანდიდატის, ტიმ უოლცის მიერ LGBTQ+ უფლებებისთვის, აბორტის უფლებისთვისა და ინ ვიტრო განაყოფიერებისთვის ბრძოლის ისტორიის მნიშვნელობასაც გაუსვა ხაზი.